सुविचार पहाड छ भाव उचा
अति सुन्दर दृश्य बगोस् रमिता !
म मदेश झरूँ निफनूँ कविता
अझ रङ्ग भरूँ उर उर्वरता ।।१।।

जल सेचन रम्य विशाल छटा
बटुलून् परिकार अनेक मिठा !
सविता नभ माझ सवार उता
भग वैभव पारित हून् जगका ।।२।।

अरुणा अरुणोदय शीर्ष शिखा
तपसी कलमी भर सिर्जनका !
पहरा वन जङ्गल झोर बुटा
छहरा खहरे मिच भोक तृषा ।।३।।

अजरामर कान्ति अखण्ड थरी
धरणी रमणीय सलक्क परी !
छ अथाह कला अवनी रचना
अनमोल अमोघ छ पर्वतमा ।।४।।

झर अर्घ सुधा भुल सर्म बुँदा
उठ जाँगर बौर सखार हुँदा !
भविता भवितव्य भविष्य कता
सुख शान्ति कवोल फिजाँर यता ।।५।।

वनिता वयकी थप सुन्दरता
कविका कृति कर्म सयौँ कविता
शिरपाउ जता पनि मोहकता
परिपाक परामृत संयमता ।।६।।

पदम दाहाल
मादी न पा ६, सङ्खुवासभा
हालः लोकन्थली, भक्तपुर ।