काठमाडौं । कागेश्वरी मनोहरा नगरपालिकामा रहेको मूलपानी क्रिकेट मैदानमा पहिलो पटक महिला क्रिकेट प्रतियोगिता हुने भएको छ । दुई खेल हुने उक्त प्रतियोगितामा कागेश्वरी मनोहरा महिला टोलीले भरतपुरको मुनस्टार स्पोटर्स एकेडेमीको सामना गर्नेछ ।

नवनिर्मित मूलपानी क्रिकेट मैदानमा पहिलो पटक महिला क्रिकेट प्रतियोगिता आयोजना हुन लागेको हो । शुक्रबार र शनिबार हुने उक्त खेल बिहान साढे ९ बजे सुरु हुने आयोजक कागेश्वरी मनोहरा नगरपालिकाले जनाएको छ ।

नगरपालिकाको आकर्षणको रुपमा रहेको उक्त क्रिकेट मैदानमा नेपालले उपाधि जितेको एसीसी प्रिमियर कपका ११ वटा खेल हालै सम्पन्न भएको थियो । नेपालमा अन्तर्राष्ट्रिय क्रिकेट मैदानको अभाव भइरहेका बेला मूलपानीमा निर्माण गरिएको उक्त क्रिकेट मैदान क्रिकेट खेल प्रेमिका लागि आकर्षण रहेको बताइन्छ ।

सुन्दर हिमालयको दृश्यसमेत क्याप्चर गर्न सकिने मूलपानी क्रिकेट मैदानको विशेषता हो । प्रकृतिसँग क्रिकेट खेललाई जोडेर विश्वमाँझ नेपाललाई पराचित गराउन मूलपानी क्रिकेट मैदान सफल हुने विश्लेषण गरिएको छ । अन्तर्राष्ट्रिय प्रतियोगिताको आयोजना गर्न सकिए उक्त मैदानमा उद्देश्यमा पुग्न धेरै समय नलाग्ने जानकारहरु बताउँछन् । नेपाल क्रिकेट संघले नगरपालिकासँग समन्वय गरेर अन्तर्राष्ट्रिय प्रतियोगिता गराउन ध्यान केन्द्रित गर्नुपर्ने खेलप्रेमिहरु बताउँछन्् ।