संखुवासभा । संखुवासभामा सिम्रिक एयरको हेलिकोप्टर दुर्घटना भएको छ । माथिल्लो अरुण जलविद्युत् आयोजनाको सामान ढुवानी गर्ने हेलिकोप्टर दुर्घटनामा परेको हो ।

हेलिकोप्टर दुर्घटनामा चारजना घाइते भएको र दुईजनाको अवस्था चिन्ताजनक रहेको भोटखोला गाउँपालिकाका अध्यक्ष वाङ छेदर लामाले जानकारी दिए । घाइतेको उद्धारका लागि नेपाली सेनाको हेलिकोप्टर परिचालन गरिएको छ ।

हटिया गोलाको छोङग्राङबाट अपर अरुण जलविद्युत् आयोजना १०६१ मेगावाटको सामग्री बोकेर उडेको हेलिकोप्टर सिप्ररुङको हम्मरे डाँडामा रुखमा ठोक्किएर दुर्घटना भएको प्रारम्भिक अनुमान छ ।

सिम्रिक एयरको हेलिकोप्टरले सामान ढुवानी गरिरहेको माथिल्लो अरुण आयोजनाका वरिष्ठ सहायक गृष्म भण्डारीले जानकारी दिए । दुर्घटनास्थल सदरमुकाम खाँदबारीबाट दुई दिनको पैदल दूरीमा पर्छ ।