काठमाडौँ । श्रम, रोजगार तथा सामाजिक सुरक्षा मन्त्रालयले आगामी श्रावण १ गतेदेखि स्वचालित प्रणालीबाट पूर्व र अन्तिम श्रम स्वीकृति दिने निर्णय गरेको छ ।

श्रम, रोजगार तथा सामाजिक सुरक्षा सचिव एकनारायण अर्यालले बिहीबार सूचना प्रविष्ट गर्न र स्वीकृति लिन श्रम कार्यालय नै पुग्नुपर्ने बाध्यतालाई अन्त्य गर्दै स्वचालित प्रणालीबाट कम्पनीमै बसेर स्वीकृति लिन सक्ने निर्णय गरेका हुन् ।

सेवा प्रवाहलाई नागरिक मैत्री र प्रविधि मैत्री बनाउँदै लगेको मन्त्रालयको यो निर्णयसँगै अब सम्बन्धित वैदेशिक रोजगारीमा पठाउने कम्पनीले नै आफ्नै कम्पनीमा बसेर सूचना प्रविष्ट गर्न सक्ने र स्वतः श्रम स्वीकृति प्राप्त गर्न सक्नेछन् ।

तर, वैदेशिक रोजगार व्यवसायीले गलत कागजात पेश गरी प्रविष्ट गरेमा वैदेशिक रोजगार ऐन, २०६४ र नियमावली २०६४ बमोजिम कम्पनी खारेजीसम्मको सजाय हुने गरी निर्णय गरिएको मन्त्रालयका प्रवक्ता डण्डुराज घिमिरेले बताए ।

यससँगै इजाजत पत्र संस्थालाई पूर्ण जिम्मेवार बनाउन विभाग र कार्यालयबाट निरन्तर अनुगमन हुने प्रबन्ध मिलाइएको प्रवक्ता घिमिरेको भनाई छ ।

वैदेशिक रोजगार ऐन, २०६४ मा भएको वैदेशिक रोजगारमा जाने हरेक कामदारले अनिवार्य रूपमा श्रम स्वीकृति लिनुपर्ने व्यवस्था भएकोमा वैदेशिक रोजगार विभागको फरिजन इम्प्लोइमेन्ट इन्फरमेसन म्यानेजमेन्ट सिस्टममार्फत कामदारहरूले अनलाइन आवेदन गरी श्रम स्वीकृति लिने व्यवस्था छ ।

हाल उक्त सिस्टमलाई समायानुकुल परिमार्जन गरी पूर्व/अन्तिम श्रम स्वीकृति सम्बन्धी कार्य स्वचालित प्रणालीबाटै गरी समयमा नै श्रम स्वीकृति प्रदान गर्ने, कार्यालयमा कार्यरत अधिकृत तहका कर्मचारीहरूलाई उक्त सिष्टमको विवरण अनुगमनमा केन्द्रित गर्ने निर्णय मन्त्रालयले गरेको हो ।

प्रविधिको प्रयोगबाट सेवालाई सहज र सरल बनाउँदै लगेका सचिव अर्यालको यो निर्णयसँगै श्रम स्वीकृति प्रदान गर्नका लागि तय गरिएको दुई तहको व्यवस्थालाई खारेज भई अधिकृतमुखी बन्ने भएको छ । यो निर्णयले श्रम स्वीकृतिको प्रक्रियालाई एक तहमा मात्र सीमित गर्दा सरल, सहज हुनुका साथै पारदर्शी एवं सेवाग्राहीमैत्री हुने सचिव अर्यालको भनाई छ । ‘जति धेरै तह थप हुँदै जान्छन् त्यति नै बढी सास्ती पाइरहेको र समय खर्च भइरहेको हुन्छ’, सचिव अर्यालले भने, ‘तीन–चार वटा लेयरलाई घटाउँदै घटाउँदै अब एक लेयरमै काम हुने भएपछि छिटो, सहज र प्रभावकारी हुने छ’

वैदेशिक रोजगार व्यवस्थापन सम्बन्धी सेवा प्रवाह गर्ने कार्यालय तथा निकायहरूबाट प्रवाह हुने सेवालाई सेवाग्राही मैत्री एवं आधुनिक सूचना प्रविधिमा आधारित बनाउँदै प्रभावकारी सेवा प्रवाह गर्न वैदेशिक रोजगार व्यवस्थापन सेवा प्रवाह कार्यविधि २०७८ कार्यान्वयनमा रहेको छ ।