काठमाडौँ । प्रधानमन्त्री पुष्पकमल दाहाल ‘प्रचण्ड’ले प्रतिपक्षी दलले माग्दैमा राजीनामा दिनुनपर्ने स्पष्टीकरण दिएका छन्। उनले गत असार १८ गते एक कार्यक्रममा आफूलाई प्रधानमन्त्री बनाउन एक व्यापारीले सक्रिय भूमिका खेलेको बताएका थिए।

सोमबार प्रतिनिधिसभा बैठकमा सांसदहरूको प्रश्नको जवाफ दिँदै प्रधानमन्त्री प्रचण्डले प्रतिपक्षी राजीनामा माग्दैमा राजीनामा दिनुपर्ने हो ? भन्दै प्रश्न गरेका छन्।

‘प्रतिपक्षीले राजीनामा माग्दैमा राजीनामा दिनुपर्ने हो ? यही हो लोकतान्त्रिक विधि ? प्रतिपक्षीले प्रश्न उठाउँदैमा प्रधानमन्त्रीलाई स्पष्टीकरणको मौका नदिने हो ?,’ उनले प्रश्न गरे। उनले आफूलाई स्पष्टीकरणको मौकासमेत नदिई राजीनामा मागिएको चिन्ता व्यक्त गरे।

थोरै भावनामा आएँ : प्रधानमन्त्री
सरदार प्रितम सिंहको पुस्तक विमोचन समारोहमा दिएको अभिव्यक्तिमा केही भावनात्मक भएको बताउँदै उनले सो कार्यक्रममा प्रधानमन्त्रीको हैसियतमा नभएर ज्ञानुको बुबा भएर बोलेको जानकारी दिए ।

प्रीतम सिंहले २०६७ सालतिर आफ्नो छोरी ज्ञानुको उपचार भारतमा गर्ने बेलामा निकै सहयोग गरेको स्मरण गराउँदै उनले भने, ‘मेरो छोरी ज्ञानुको उपचारका क्रममा भएका कुरा मैले त्यहाँ कुरा गरेको हुँ, नबोलेको भए पनि हुने थियो । म अलि भावुक बनेकै हुँ, तब न प्रचण्ड । त्यसदिन म प्रधानमन्त्री होइन ज्ञानु (छोरी)को बुबा भएर बोलेँ । म अलिकति भावनात्क छु । म थोरै भावनामा आएँ ।’